Общество

Номууд оршуулагдахань

30 октября 2024 59
Буряад ТВ

Эндэ һаяхан буряад хэлэнэй хүгжэлтын асуудалаар тусхай комиссии суглаалжа, хэдэн шиидхэбэринүүд абтагдаа һэн. Тэрэ тоодо һургуулиин буряад хэлэнһээ бусад номуудые түрэл хэлэн дээлэ оршуулжа, бүхы хэшээлнүүдые буряад хэлэн дээрэ зааха юм. Тэрэ хэрэг бэелүүлхэ түрүүшын алхамууд хэгдэжэ эхилбэ.

Нэн түрүүн эхин шатын һургуулиин номуудые оршуулха хэрэгтэй гээд эрдэмтэд хэлэнэ. Нэгэдэхи ангида буряад хэлэн дээрэ һураха дүрбэн ном гаргаха түсэб табигданхай. Тоолобол, тоо бодолго, «Оршон тойронхи дэлхэй», технологи, хүгжэм гэһэн хэшээлнүүд оролсоно. Оршуулагдаһан номууд нэн түрүүн буряад хэлэн дээрэ һуралсал хэдэг һургуулинуудаар тараагдаха юм. Улас дотор хамта дээрэ тиимэ 106 һургуулинууд ажаллана, Улаан-Үдэ хото дээрэ - хоёр. 

 Болбосоролой болон эрдэм ухаанай сайдай тэмдэглэһээр энэ хэрэг бэлэн бэшэ, ехэхэн саг үгтэхэ ёһотой. Теэд багахан алхамуудаар ябаха хэрэгтэй гээд хэлэнэ. Түрүүн 1-дэхи, һүүлээрнь 2-дохи, 3-дахи ангинуудай номудд оршуулагдаха. 2025 ондо һуралсалай түрүүшын номууд оршуулгада орожо, хэблэлнүүдынь 2026 оной сентябрь һарада нара хараха. Нэгэдэхи ангиин һуралсалай номуудай оршуулгада уласай бюджедһээ гурбан сая түхэриг һомологдохоор хараалагдана. Энэ түсэл бүхыдөө 2029 он болотор  дүүргэхээр түсэблэнхэй. Гадна энэ ажалай шугамаар һуралсалай хэблэлнүүдые хэрэглэжэ хүдэлхэ шадабаритай багшанарые бэлдэхэ, мэргэжэлыень дээшэлүүлхэнь шухала.