Соёлой байшанhаа hургуулиин стадион хүрэтэр жагсаалаар «Забайкальский» тосхоной 80 жэлэй ойн баяр эхилээ. Эндэ тосхоной ажаһуугшад, элдэб hалбарида ажалладаг мэргэжэлтэд гол гудамжануудаар алхалба. Үхибүүдэйнгээ коляскануудые элдэб түхэлөөр шэмэглэhэн айлшад жагсаалай гоёолто болобо.

 Үнэхөөр анхан 1970-80-яад онуудта сэнхир сагаан үнэгэ, халтар хара үнэгэ болон булганай арhа баридаг «Зверосовхоз» гэhэн баян ажахы байhан юм. Гэбэшье, мүнөө «Забайкальский» үзэсхэлэн байгаалитай, «Байдонов» булагтай, гадна ажалша бэрхэ ажаhуугшадаар баян тосхон юм.

Тосхоной ажабайдал бурьялжал байhаар. ТОС-ууд хамтын ажал ябуулдаг, «Найдал» гэhэн дуу хүгжэмэй ансамбль элдэб мүрысөө-харалгануудта тосхонойнгоо нэрэ түлөөлэн хабаадажал байдаг.

 Ойн баяр үндэр хэмжээндэ үнгэрөө. Ажаhуугшад 80 жэлэйнгээ ойн баяр тэмдэглэжэ, шэнэ hуралсалай хаhын эхилхэтэй хамта элдэб hалбариин ажал руугаа шунгахаар бэлэн эршэтэйнүүд байна.