Агын Буряадай тойрогто «Нүүдэлшэн» гэhэн аян замай газарта 6-дахияа Хорхогой наадан эмхидхэгдэбэ. Энэ удаа арбан хоёр мянгаhаа үлүү зониие хүршэ Монгол, Хитадай болон Оросой нютаг можноуудhаа суглаалжа, уласхоорондын хэмжээгээ гэршэлбэ.

Хорхог гээшэ буряад-монголшуудай үндэhэн мяхан эдеэн ха юм даа. Yни урда сагhаа энээние шанажа, холын харгыдаашье, найр наадануудтаашье олон тоото түрэлхид гаралаа суглуулжа, амтатайхан мяхан табагаар хүндэлдэг байhан. Тэрэ ёhо заншалаа үргэлжэлүүлэн, Хорхогой наадан гээд Агын тойрогто үнгэргэдэжэ эхилhэн. Мүнөө жэл зургаан гэр бүлэ хорхог хэхэ урилдаанда оролсоо. Тэдэнэй тоодо Табтаанай нютагай Доржо ба Раиса Батоевтан, Угдаанай Баир ба Солонго Батоцыреновтан, Ага тосхоной Сокто ба Аюна Жаргаловтан болон бусад. Хони гаргаад, тэрэнээ зүбөөр эбдэжэ, буйлууулха даабаритай байгаа. 

 Урилдаанай дүнгүүдээр Согто-Хангил нютагай Зорикто ба Туяна Батоевтан Гран-При шанда хүртөө. Фестивалиин хэмжээндэ тамирай болон соёлой талаар хэдэн харалга, мүрысөөнүүд эмхидхэгдээ. Тэрэ тоодо «Yндэhэн буряад хубсаhатай гэр бүлэ», уран дархашуулай үзэсхэлэн, hур харбаан, hээр шаалган, шагай наадан болон бусад. Анха түрүүшынхиеэ «Тэбэг» гэhэн үндэhэн буряад наадаар мүрысөөниие «Буряад ТВ» субагай Агын таhаг эмхидхээ. Хамта дээрээ 45 тамиршад оролсожо, наhанай 4 хэмжүүрөөр илагшад элирээ. Эгээл оло 97 дахин тэбэг сохижо, Будалан нютагай залуу Тамир Цырендашиев хүбүүн хубиин тэмсээндэ шангай түрүү hуурида гарахаhаа гадна, мүрысөөнэй эгээл эрхим тамиршан гээд нэрлэгдээ.