Үбэр-Байгалай хизаар дотор гансал “Толон” газетэ буряад хэлэн дээрэ һонинуудые, соёлой болон буряад арадай ёһо заншалай аргагүй сэнтэй зүйлнүүд тухай бэшэжэ гаргадаг. Долоон хоног бүхэндэ шэнэ дугаар хэблэгдэжэ, хизаарай нютаг һуурингуудаар тарадаг. Теэд “Толоной” нюур дээрэ гараһан юумэнүүдээ түүхын оршондо бү үлэшэг гэжэ сэтхүүлшэд бодоод, тэрээнээ номууд болгон согсолжо байха гэжэ шиидээ. Анха түрүүшын ном «Толоной абдарhаа» гээд нэрлэгдэжэ, 2015 ондо газетын 25 жэлдэ зорюулагдан нара хараа. Удаань проза суглуулагдажа хоёрдохи ном хэблэгдэһэн.

Удаадахи хэблэл Эрхүүгэй “Алтарганын” урда тээ, 2018 ондо “Һолонго” гэжэ нэрлээд, үри хүүгэдтэ сурбалжалагшад зорюулһан. Эндэ гол түлэб үхибүүдэй бэлээр сээжэлдэхэ богонихон шүлэгүүд Агын уран урлалай һургуулиин хүүгэдэй зурагуудаар шэмэглэгдэжэ гараа. Мүнөө жэл баһал эдиршүүлэй хүмүүжүүлгэдэ тон хэрэгтэй “Барбаадай” гэжэ нэрэтэй ном хэблэгдээ.

“Толоной” сурбалжалагшад Улаан-Үдэ хотодо үнгэрһэн “Алтаргана” нааданай номуудай харалга-мүрысөөндэ шэнэ хэблэлээ табижа, олондо дурадхаа. Теэд түрүүшүүлэй тодо энэ удаа оробогүй. Харин сэтхүүлшэд Долгор Раднабазарова, Дина Сундуева хоёр хэблэлэй “Хэрэгсэлнүүдэй дунда буряад хэлэн дээрэ эрхим оригинальна хэблэл” болон «Ондоо хэлэн дээрэ эрхим оригинальна зохёол» гэһэн шэглэлдэ илажа гараа.