«Возрождение» гэһэн үйлэдбэриин нэгэдэл буряадай ниислэлдэ гурбадахи хүүргэ бариха талаар бэлэдхэлэй ажалнуудаа эхи татаба. Энээн тухай Буряадай Засагай газарай түрүүлэгшын орлогшо Евгений Коркин дуулгаба.
Тэрэнэй тэмдэглэһээр, мүнѳѳ дээрээ шэнэ хүлһэлэгшэ бүридхэлгэ, дансануудые тушаан абаха ажал ябуулна, материалнуудаар хангаха хэлсээнүүд баталагдана, хүдэлмэрилэгшэдые элсүүлэн абаха ажал ябуулагдана. Хажуугаарынь хорёо һэльбэн заһалга, хүдэлмэришэдэй байра байдал түхеэрхын тула ажахын вагонуудые худалдан абажа байна.
Мүнѳѳдэртѳѳ объектын бэлэн байлга зуунай 49 хуби болоно. Урда жэлнүүдтэ хүүргэ дээгүүр гараха хэрэгсэлэй 80 хуби хэгдэһэн, дулаанай һужаануудай 75 хуби шэнээр баригдаа, 57 хуби - уһаар хангалгын ба сэбэрлэлгын һужаанууд, тулга ханануудай бэлэн байлга 54 хуби болоно. Тиихэдээ хэдэн гол объектнүүд үлөө: трамвайн замуудые шэнээр түхеэрэлгэ, тоннельнэ түхэлэй хүүргэ ба харгы дээрэхи хоёр хүүргэ.
