Буряад ТВ субаг тэбэг гэһэн арадайнгаа үндэһэн наада хүгжөөһөөр зандаа. Энэ удаа Монголһоо буужа ерэһэн залуушуулда тэбэг тухай хөөрэбэ, харуулба. Сүхэ-Баатар хотын һурагшад Улаан-Үдын «Асториум» гэһэн түб ород хэлэ гүнзэгыгөөр шудалхаяа ерэһэн байна. Буряад-монголшуудай наадан үни урда сагһаа дамжан маанадта ерэһэн түүхэтэй, дээдэ үеын зон балшар наһандаа наададаг байһан байна. Оршон сагта үндэһэн тамирай зүйл дахяад һэргээгдэнэ, олон зон энэ хэрэг дэмжэн абанхай.

Монголой һурагшадай болон багшанарай хоорондо манай субагай ажалтад багахан мүрысөө эмхидхэбэ. Бултадаа эдэбхитэй наадажа, илагшад шэнэ дүршэлтэй болоһондоо ехэ баяртайнууд. Буряад орон ерэжэ ганса хэлэ шудалха бэшэ, соёлой, түүхын талаар үргэн мэдэсэтэй айлшад болобо. Гол түлэб, түрэл арадууд гээшэбди гэжэ мэдэрбэ, бэеэ дээрэ үзэжэ ойлгобо. Улаан-Үдэ хотоор аяншалжа, эгээл мэдээжэ үзэсхэлэнтэ газарнуудаар ябажа залуушуул һонирхобо.

Мүрысөөнэй дүнгүүдээр хабаадагшад булта урмашуулагдаа. Ехэнхинь анха түрүүшынхиеэ тэбэг сохижо туршаба, үндэһэн наадантай дүтэ танилсаа. Тэбэг наадамнай хүршэ Монголой дэбисхэрээршье хүгжэхэнь, дэлгэрхэнь болтогой. Иимэ уулзалганууд энэ хэрэгэй үндэһэ һуурин болохонь дамжаггүй.