«Залуу» гэһэн мүнөө үеын урлалай түбтэ Германида ажаһуужа ажалладаг уран зурааша, багша Зоя Голетц хубиингаа үзэсхэлэн дэлгэбэ. Тус үзэсхэлэн " Хранители света. Манифест внутренней силы" гээд нэрлэгдэжэ тусхайтаар бүтээгдэһэн шэнэ хэһэг зохёолнуудые нэгэдүүлнэ. Энэ үзэсхэлэндэ хүнэй доторой хүсэн, буряад арадай соёл гэхэ мэтэ мүнѳѳ үетэй тааруулан харуулагдана.

Үзэсхэлэнэй нээлгэдэ уран зураашанай олон нүхэд, түрэлхидынь, зохёохы ажал ябуулгада дуратайшуул олоор ерээ. Арюн Гоа дуушанай тоглолто энэ үдэшын гоёолто болоо.

Үзэсхэлэнэй онсо шэнжэ гэхэдэ, байгаалиин Балтиин хуба хэрэглэлгэтэй ажалнууд уран һайханай тодо дүрэнүүдые байгуулна. Мүн тиихэдэ Зоя Голетц уран зураашын үшѳѳ нэгэ үзэсхэлэн хотын түүхын мүзейдэ дэлгэгдэнхэй.