Байгша ондо Эгэтын дасан 200 жэлэйнгээ ой тэмдэглэхэнь. Энэ һайндэртэ бэлэдхэлэй ажал эршэдэнхэй, багахан саг үлэбэ гээшэ. Ойн баяр долоодохи һарын 24-25-най үдэрнүүдтэ үнгэрхэ. Хоёр үдэрэй туршада элдэб хэмжээ ябуулганууд түсэблэгдэнхэй. Һайндэртэ хаа-хаанаһаа айлшад олоор ерэхээр хүлеэгдэнэ.
Тэрээнһээ гадна шүлэглэмэл болон дуунай түхэлтэй магтаалнуудай мүрысѳѳнүүд, «Эгэтын дасанай уран бэлиг» гэһэн үзэсхэлэн эмхидхэгдэхэ. Дасанай заншалта ёһоор, Ехэ хурал хурагдажа, тэрэнэй удаа “Цам” гэһэн хатар олондо дурадхагдаха. «Эрын гурбан наадан», мүн тиихэдэ һээр шаалган болон шагай наадаар тамиршад хаба шадалаа туршаха. Элдэб талмайнууд ажалаа ябуулха. Ерэһэн айлшадта аймагуудай уран һайханай бүлгэмүүд болон уласай мэдээжэ дуушад тоглолто табиха юм.
