Буряад Уласта үерһөө боложо соносхогдоһон онсо байдал үргэлжэлһөөр. Мухар-Шэбэрэй, Загарайн, Тарбагатайн, Бэшүүрэй аймагуудта хэдэн һуурингууд уһанда абтаа гээд хөөрөө һэмди. Тэндэ хохидогшодто мүнгэн ба бусад туһаламжа үзүүлэгдэнэ, харгы болон хүүргэнүүдые заһабарилгын ажал хэгдэжэл байнхай. 
Августын долооной үдэшэ Ивалгын аймагай Кибалино һуурин баһал бороогой уһанда абтаа гээд соносхогдоо бэлэй. Тэндэ 26 гэр бүлын хорёо руу уһан оронхой, мүндэр орожо, табан гэрнүүдэй хушалта эбдэрээ, харин байранууд уһанда абтаагүй үгы гэжэ тодорхойлогдоно. Тиихэдэ тусхай техникэ айлай хорёонууд сооһоо бороогой уһа һорожо гаргаһаар. 
Мүнөөдэр Сэлэнгэ ба Үдэ голнуудай уһанай хэмжээ ехэ болоо гээд Улаан-Үдэ хотын захиргаан мэдээсэнэ. Нэгэ хоног соо Үдэ голой уһанай хэмжээн 28 сантиметрээр ехэ болоо, Сэлэнгын –14 сантиметрээр. Новоселенгинск, Хяагтын Адаг, Наушки һуурингуудаар Сэлэнгэ мүрэн эрьеһээ гаранхай. Нугануудынь 29, 23, 8 сантиметр уһанда абтаад байна. 
Һаядаа Буряад Уласай урда, баруун урда болон түб аймагуудаар голнууд үерлэжэ, уһаниинь нуга руу гаража болохо гэжэ соносхогдоно. Сэлэнгэ, Үдэ мүрэнүүдэй эрьеэр ажаһуудаг айлнуудые нүүн гаралгада бэлэн байгты гээд захиргаанай мэргэжэлтэд уридшалан мэдүүлнэ.