Буряад Уласта үерһөө боложо онсо байдал соносхогдоо. Бороогой ехээр ороһон ушарһаа Мухар-Шэбэрэй, Загарайн, Тарбагатайн, Бэшүүрэй аймагуудта зарим һуурин тосхонууд уһанда абтаа. Мухар-Шэбэрэй аймагта “Байгал” гэһэн гүрэнэй мэдэлэй автоунаагай ехэ харгы дээрэ уһан гараһан байна. Мүн лэ зуу гаран гэрнүүд уһанда ороо. Харгынууд хаагдажа, автомашинын ябаха хоригдоо. Хүүргэнүүд болон түмэр замай харгынууд һандараа
104 айлай газар уһанда абтаа, үшөө 374 бүлын газар бог шоройдо, шабарта булагдаа. Гүрэнэй, нютаг можын болон нютагуудай бүхы албанууд үдэр һүнигүй уһанһаа хамгаалха талаар ажал ябуулна. “Байгал” гэһэн гүрэнэй автоунаагай ябадаг замай зарим газарта хүндэ ашаанай машинанууд хэдэн часай туршада зогсоно. Тэдээндэ һайн дураараа ерэһэн зон туһална. Үерһөө хохидогшод уһаар, эдеэ хоолоор хангагдана. Мүн лэ уһанда абтаһан айлнуудта гүрэн мүнгөөр туһалха.
Булат Базаровай хэлэһээр, мүнөө үедэ үерһөө боложо, байдал бүри муудаха гэжэ уридшалан хэлэгдэнэгүй. Хэдэн хоногой туршада уһанай аюулһаа ушарһан хохидолой хэмжээн арга боломжоороо тодорхойлогдохо. Тэрэнэй тоодо үхэр малтай болон огородтой холбоотой хохидол оруулагдаха юм.
