Һургуули хадаа үдэр бүри шэнэ нээлтэнүүдээр эхилдэг эрдэмэй гуламта гээшэ. Эндэ һурагшад ганса уншажа, бэшэжэ, тооложо һурадаг бэшэ, харин нүхэсэжэ, суг хамта асуудалнуудаа шиидхэжэ һурадаг. Эгэтын-Адагай дунда һургуули нютагтаяа сасуу, байгша ондо 95 жэлэй ойн баяраа тэмдэглэнэ. Энэ һургуули түүхээрээ, мэдээжэ багшанараараа, дүүргэгшэдээрээ холо ойгуур суурханхай

Эгэтын-Адагай дунда һургуули «Болбосорол» гэһэн үндэһэн түсэлэй хэмжээндэ «Россиин эрхим һургуули» гэһэн мүрысөөндэ 1 сая түхэригэй грантда хүртөө. Тэрэ «Знак качества образования» гэһэн дипломоор шагнагдаһан, Россиин «Школа года» гэһэн мүрысөөнэй лауреат, уласай, аймагай мүрысөөнүүдэй илагша. Һургуулиин дэргэдэ «Юнармия» клуб бии, «Орлята России» гэһэн программа бэелүүлэгдэнэ, тимуровска хүдэлөөн ажаллана. Үхибүүд багаһаа сэрэгэй алба хааха зүйлнүүдтэ һурана, автомат задална, суглуулна, олон мүрысөөнүүдтэ хабаадана. Сэрэгэй тусхай ябуулгада байһан сэрэгшэдээ дэмжэжэ, далдалан халхалха хэрэгсэлнүүдые, окопно дэнгүүдые бүтээнэ, сэрэгшэдтэ бэшэгүүдые бэшэжэ, тэдэнэй һүр һүлдые бодхооно. 
Һургуули дотор элдэб хэмжээ ябуулганууд, мүрысөөнүүд, нэмэлтэ һуралсалай хэшээлнүүд үнгэргэгдэдэг. Һүүлэй үедэ хүнүүд нооһоор юумэ бүтээдэг болонхой, тиихэдэ эндэхи һурагшад нооһоор баһал элдэб зүйлнүүдые бүтээнэ.  

Эгэтын-Адагай багшанар гайхамшагта баялигаа  алдангүй үлээжэ, өөһэд дундань дүтөөр харилсуулха, һурагшадайнгаа хоорондо таарамжатай оршон байдал байгуулхын тулөө оролдодог. Хүүгэд болон залуушуулые буряад хэлэ үзэлгэдэнь урмашуулан дэмжэжэ, түрэл арадайнгаа хэлэ, соёл, урлал, түүхые саашань арьбадхан болбосоруулха хүсэл түрүүлжэ, түрэл арадай баялиг болохо эжы абынгаа  хэлэн дээрэ алдангүй хөөрэлдүүлхэ гэһэн зорилготой.