Уласаймнай һургуулинуудай буряад хэлэн болон уран зохёолой багшанарай дунда «Эрхим багша–2023» гэһэн улас түрын мүрысөөн түгэсхэбэ. Эндэ 19 багшанар дүй дүршэлөөрөө хубаалдажа, бүхы шадабарияа харуулаа , тэндэһээ 15-иинь уласай аймагуудһаа, 4-иинь Улаан-Үдэ хотын һургуулинуудһаа байгаа. Тиихэдэ 1-дэхи лицей интернадай буряад хэлэнэй багша Дулма Шойнжонова дээдэ Гран-При шанда хүртэбэ.
Тус мүрысөөн хэдэн шатаһаа бүридөө. Тиихэдэ багшанар бүхы шадабарияа харуулжа, эдэ шатануудые гаталжа гараһан байна. Тэдэ хэшээлнүүдтээ ѳѳрын онсо онол аргануудые, шэнэ үеын оньһон түхеэрэлгэнүүдые, элдэб арга боломжонуудые хэрэглэжэ, хүмүүжүүлгын талаар һурагшадтаа заатагүй баримталжа ябадаг тухайгаа энэ мүрысөөндэ харуулһан байна.
Тиихэдэ Буряад Уласай Болбосоролой болон эрдэм ухаанай сайдай орлогшын уялгануудые саг зуура дүүргэгшэ Батор Цыренжапов «Эрхим багша» мүрысөөндэ хабаадагшадые амаршалаад, шангуудые барюулаа.
Хабаадагшад өөрсэ маягтай, өөрын тодо зорилготой «Хэшээл», «Ангиин саг», «Һургаха газар», «Сайдтай хөөрэлдөөн» гэһэн шалгалтын дүрбэн шата гаталжа, түрүү зэргэдэ гараха ёһотой байгаа. Тиихэдэ 1-дэхи һуурида Хэжэнгын 1-дэхи дунда һургуулиин багша Бэлигма Бадмацыбикова, 2-дохидо – Сэлэнгын аймагай Загастайн дунда һургуулиин багша Аюна Доржиева, 3-дахи һуурида Захааминай аймагай Сахирай дунда интернат-һургуулиин багша Туяна Банзаракцаева гэгшэд гараба. Тус мүрысөөн буряад хэлэеэ хамгаалха, хүгжөөхэ, дэлгэрүүлхэ, эрхим багшанарай хубиин оюун бэлиг, мэргэжэлэй дээдэ шадабари элирүүлэн, тэдэниие дэмжэхэ ба урмашуулха гэhэн зорилготойгоор эмхидхэгдэнэ.