Франциин Париж ниислэлдэ ажабайдалаа зохёохын  орондо Орос гүрэндөө Глинкын дуунай мүрысөө шэлэжэ, нютагтаа үлэһэн дуушан. «Золотой софит», «Жар птица» мүрысѳѳнүүдэй шангуудта хүртэһэн, «Бриллиантовая лира» гэһэн дэлхэйн урлалай шагналай номинант, Россиин габьяата зүжэгшэн, Буряад Уласай арадай зүжэгшэн Валентина Цыдыповагай зохёохы үдэшэ Исай Калашниковай нэрэмжэтэ номой һанда үнгэрбэ

Тэрэнэй хоолой дэлхэйн эрхим оперын тайзанууд дээрэ зэдэлжэ, «Дэлхэйн мүнгэн хоолой» гэжэ нэрэ зэргэдэ хүртэһэн юм. Иимэ суута дуушан тухай хүн бүхэн, илангаяа залуушуул мэдэхэ ёһотой. Эгээл иимэ зорилготойгоор энэ хэмжээ ябуулга эмхидхэгдэбэ.

Валентина Цыдыпова Буряадай оперо болон баледэй театрта мүнөө болотороо ажаллана, тэрэ гоё һайхан хоолойгоороо түрэл оронойнгоо ажаһуугшадые баясуулһаар зандаа. Ойн баярайнь үдэшэдэ нүхэдынь, нютагаархидынь, суг ажалшад болон дуратайшуул суглараа. 

Тус уулзалга оперонуудһаа абтаһан аринуудаар, романснуудаар, Буряадай зохёолшодой дуунуудаар шэмэглэгдэбэ. Һайн һайхан амаршалганууд, үнэн зүрхэнһөө хэлэгдэһэн баяр баясхалангай үгэнүүд, дулаахан оршон байдал энэ зохёохы үдэшые үнэхөөрөөшье мартагдашагүй болгоо.