Анхандаа буряадууд хуушан буряад-монгол бэшэг хэрэглэдэг байһан, һүүлдэнь лата бэшэгтэ ороо. Иимэл бэшэгүүдээр 1930-аад онуудта хэблэгдэһэн элинсэг хулинсагуудаймнай ажабайдал, ёһо заншал тухай хөөрэһэн номуудай удхаар Буряад Уласай Үндэһэтэнэй номой сан онсо карточкануудые гаргаба.
Үндэһэтэнэй болон можо нютагуудай дансануудые хадагалдаг түбтэй хамта тус номууд шэлэгдэжэ абтаһан байна. Суглуулбариин түхэлые уран шэмэглэгшэ Аюр Халтуев бүтээгээ.
Хуушан монгол хэлэнһээ текстнүүдые оршуулха хэрэгтэ «Титэм-Арт» гэһэн каллиграфиин студи туһалаа. Карточкануудые тусхай альбомууд соо суглуулхада, гар утаһаяа гоёоходо, бэлэг болгон үгэхэдэ гү, али дурасхаалай зүйл болгон хадагалхада болохо.
Эдэ карточканууд наймаалагдадаггүй, гансал уласай Үндэһэтэнэй номой сангай хэмжээ ябуулгануудта хабаадаад, тэрээндэ хүртэхэ арга бии.
