Культура

«Созвездие молодых»

23 января 147
Буряад ТВ

Лимбын һонирхолтой аялга, ород арадай зэмсэгүүдэй оркестр, классическа хүгжэмэй гайхамшагта бүтээлнүүд. Чайковскийн нэрэмжэтэ урлалай колледжын эмхидхэһэн «Созвездие молодых» гэһэн заншалта фестивалиин мартагдашагүй гурбан тоглолто Буряадай ниислэл хотодо үнгэргэгдэхэнь

Энэ хадаа шэнэ нэрэ, шэнэ ододые нээдэг, жэл бүри үнгэргэгдэжэ байдаг хүгжэмэй наадан. Тус наадан хододоо үндэр хэмжээндэ үнгэржэ, олоной һонирхол татажа байдаг.

Тиин фестивалиин түрүүшын тоглолто Сампиловай нэрэмжэтэ уран зурагай музейдэ январиин 29-дэ үдэшын 6 сагта үнгэрхэ. Эндэ Софья Алексеевагай лимбэ дээрэ наадахые шагнаха аргатайт. Мүн февралиин 2-то үдэшын 5 сагта «Диалог поколений» гэһэн тоглолто Чайковскийн нэрэмжэтэ урлалай колледжын танхим соо харахада болохо. Фестиваль февралиин 4-дэ үдэшын 6 хахад сагта Оперо болон баледэй театрта Оросой зохёохы ехэ һургуулинуудай оюутадай тоглолтоор түгэсэхэ. Биледүүдые intickets.ru гэһэн сайт дээрэ абаха арга бии. Ниислэл хотымнай соёлой ажабайдалда болохоо байһан энэ ехэ үйлэ хэрэгые бү алдагты.