«Жаргалтай бүлэ» гэһэн зүжэгөө  Дэрээнэй арадай театр хотынгоо харагшадта дурадхаба. Эндэ 90-ээд онуудта хэсүү хүндэ байдалда орожо, гэргүй болоһон, бог шорой хаядаг газарта ажаһуудаг зонуудай ажабайдал харуулагдана. Зүжэгэй гол герой–79 наһатай Эсэгэ ороноо хамгаалгын  Агууехэ дайнай ветеран–баһал байха гэргүй боложо, удаан тэнэжэ төөрижэ ябаһанаа, һүүлэй һүүлдэ эндэл ерэжэ байрлана.

Дэрээнэй арадай театр апрель һарада аймагайнгаа  «Театральна хабар–2023» гэһэн фестивальда энэ зүжэгөө харуулжа, 2-дохи һуури эзэлһэн байна.

Энэ зүжэг олон зон харахаяа ерээ, тэндэ гансал нютагаархидынь ерээ бэшэ, мүн тиихэдэ олон дуратайшуул ерэһэн байна.

 Хурамхаанай аймагые талаан бэлигтэй зоной үлгы гэжэ нэрлэдэг, тэндэhээ олохон мэдээжэ дуушад, зүжэгшэд, шүлэгшэд, уран зураашад гаранхай. Энэ аймагтамнай аяар зургаан арадай театрнууд ажалладаг. Тэдэнэй тоодо  Баргажан голой эхинэй үндэр Сахилтаар болон Бууралтаар уулануудай хормойн Дэрээнэй арадай театр 63 жэлэй туршада харагшадаа баярлуулжа байдаг. Энэл театрһаа 5 Буряад Уласай Соёлой габьяата ажалшад гараһан юм.