Алтан дэлхэй дээрэ бусад яһатан зондо буряад байһанаа мэдүүлхэ зорилготойгоор хатар-бүжэг зохёохо талаар Арадай уран бэлигэй улас түрын түб горитойхон ажал ябуулна. Тиин түрүүшынхиеэ буряад бүжэгтэ зорюулагдаһан хүгжэм зохёолгын энэ мүрысѳѳ уласай Соёлой яаман, Будаадын шажантанай заншалта Сангха үүсхэн байгуулаа.
Мүрысѳѳнэй эрилтээр буряад хатарай хүгжэм нэгэ жэгдэ дабтасатай байха ёһотой.
Тус мүрысѳѳндэ хабаадалсахаяа һанабал, мэдүүлгэеэ Арадай уран бэлигэй улас түрын түб руу байгша оной майн 15 болотор эльгээхэдэ болоно. Энэ мүрысѳѳнэй жама ёһоор 5 илагшад шэлэгдэн абтаха болоно. Тэдээн сооһоо нэгэ илагша арадай һунгалтаар тодорон элирүүлэгдэхэ. Буряадай ниислэл түб хотодо үнгэрхэ Сурхарбаан-нааданда тус мүрысѳѳнэй илагшадта үнэтэ бэлэг болон шагналнууд барюулагдахаар түсэблѳѳтэй. Хүгжэмшэдэй мүрысѳѳндэ Станислав Гармаев 1 сая түхэриг, Артём Лаукарт 500 мянган түхэриг үгэжэ, туһа хүргэһэн байна.
