Хурамхаанай аймагай  түүхын болон арадай заншалта гар урлалай музей “Соёл” гэһэн үндэһэн түсэлэй хэмжээндэ  “Можохоорондын болон нютагай засагай байгууламжануудай музейнүүдые оньһон түхеэрэлгэнүүдээр хангалга” гэһэн  шэнэ хэмжээ ябуулгын һайнда 3 хахад сая түхэригтэ хүртэһэн байна.

Олон жэлэй туршада музей өөрын байшангүй байһан, харин хүгжэмэй һургуулиин хуушан байшан заһабарилагдажа,  2018 ондо  музей болгогдоһон байна. Мүнөө дээрээ музей дотор 804 зүйлнүүд бии гэжэ тоологдоно. Тиихэдэ байшангай бага байһан дээрэһээ олонхи зүйлнүүд үзэсхэлэндэ  дэлгэгдэхэ аргагүй байдаг, энэ ушарһаа тэдэнэр һаяын үедэ байшангаа залгажа, ехэ болгохоор түсэб табижа байнхай.

Нютагайнгаа бэлигтэй соёлой ажалшад тухай мэдээнүүдые суглуулжа бэлдээд, музейнгээ нэгэ буланда һонирхолтой үзэсхэлэн дэлгэхэеэ түхеэржэ  байһанаа  тэдэнэр дуулгана. Энэ бүхэли хэмжээ ябуулганууд  Буряад Уласай 100 жэлэй ойн баярта  зорюулагдана гэжэ тэмдэглэлтэй.